ภิกฺขุนี สามเณรี วา, วิหารสฺมิํ สเจ มตา;

โหนฺติ ตสฺสา ปริกฺขารา, ภิกฺขุนีนํ ตุ สนฺตกาฯ

[2741]

‘‘เทหิ เนตฺวาสุกสฺสา’’ติ, ทินฺนํ ตํ ปุริมสฺส ตุ;

‘‘อิทํ ทมฺมี’’ติ ทินฺนํ ตํ, ปจฺฉิมสฺเสว สนฺตกํฯ

[2742]

เอวํ ทินฺนวิธิํ ญตฺวา, มตสฺส วามตสฺส วา;

วิสฺสาสํ วาปิ คณฺเหยฺย, คณฺเห มตกจีวรํฯ

[2743]

มูลปตฺตผลกฺขนฺธ-ตจปุปฺผปฺปเภทโต;

ฉพฺพิธํ รชนํ วุตฺตํ, วนฺตโทเสน ตาทินาฯ

[2744]

มูเล หลิทฺทิํ, ขนฺเธสุ, มญฺเชฏฺฐํ ตุงฺคหารกํ;

ปตฺเตสุ อลฺลิยา ปตฺตํ, ตถา ปตฺตญฺจ นีลิยาฯ

[2745]

กุสุมฺภํ กิํสุกํ ปุปฺเผ, ตเจ โลทฺทญฺจ กณฺฑุลํ;

ฐเปตฺวา รชนํ สพฺพํ, ผลํ สพฺพมฺปิ วฏฺฏติฯ

[2746]

กิลิฏฺฐสาฏกํ วาปิ, ทุพฺพณฺณํ วาปิ จีวรํ;

อลฺลิยา ปน ปตฺเตน, โธวิตุํ ปน วฏฺฏติฯ

[2747]

จีวรานํ กถา เสสา, ปฐเม กถิเน ปน;

ตตฺถ วุตฺตนเยเนว, เวทิตพฺพา วิภาวินาฯ

จีวรกฺขนฺธกกถาฯ

มหาวคฺโค นิฏฺฐิโตฯ

จูฬวคฺโค

ปาริวาสิกกฺขนฺธกกถา

[2748]

ตชฺชนียํ นิยสฺสญฺจ, ปพฺพาชํ ปฏิสารณํ;

ติวิธุกฺเขปนญฺจาติ, สตฺต กมฺมานิ ทีปเยฯ

[2749]

เตจตฺตาลีส วตฺตานิ, ขนฺธเก กมฺมสญฺญิเต;

นวาธิกานิ ติํเสว, ขนฺธเก ตทนนฺตเรฯ

[2750]

เอวํ สพฺพานิ วตฺตานิ, ทฺวาสีเตว มเหสินา;

โหนฺติ ขนฺธกวตฺตานิ, คหิตาคหเณน ตุฯ

[2751]

ปาริวาสญฺจ วตฺตญฺจ, สมาทินฺนสฺส ภิกฺขุโน;

รตฺติจฺเฉโท กถํ วุตฺโต, วตฺตเภโท กถํ ภเว?

[2752]

สหวาโส วินาวาโส, อนาโรจนเมว จ;

ปาริวาสิกภิกฺขุสฺส, รตฺติจฺเฉโท จ ทุกฺกฏํฯ

[2753]

เอกจฺฉนฺเน ปนาวาเส, ปกตตฺเตน ภิกฺขุนา;

นิวาโส ทกปาเตน, อุกฺขิตฺตสฺส นิวาริโตฯ

[2754]

ปาริวาสิกภิกฺขุสฺส, อนฺโตเยว น ลพฺภติ;

อิจฺเจวํ ปน นิทฺทิฏฺฐํ, มหาปจฺจริยํ ปนฯ

[2755]

‘‘อวิเสเสน นิทฺทิฏฺฐํ, มหาอฏฺฐกถาทิสุ;

อุภินฺนํ ทกปาเตน, นิวาโส วาริโต’’ติ หิฯ

[2756]

อภิกฺขุเก ปนาวาเส, อนาวาเสปิ กตฺถจิ;

วิปฺปวาสํ วสนฺตสฺส, รตฺติจฺเฉโท จ ทุกฺกฏํฯ

[2757]

ปาริวาสิกภิกฺขุสฺส, ภิกฺขุํ ทิสฺวาน ตงฺขเณ;

นาโรเจนฺตสฺส เจตสฺส, รตฺติจฺเฉโท จ ทุกฺกฏํฯ

[2758]